جريدة الصباح

يقولون إن هالرطوبة اللي في الديرة هاليومين طلعت خياس مستشفى الجهراء وبانت عيوب الصرف الصحي فيه ويقولون بعد ان رجال الأمن اللي فيه ما لهم شغل بأحد وبس طايحيله تطمش على المسلسلات اللي تعرضها قناة فنون ويقولون بعد أن الكتاب محولين مكاتب الاستقبال في المستشفى إلى ديوانيات كل موظف يايب رفيجه معه يسليه بزام الليل وإحنا إنقول هاي يا وزارة الصحة!

الظاهر ان وزارة الصحة حاطة بآذانها طينة وعجينة مرة واحدة، يعني مو معقولة ابد ان اللي عنده مشاكل بأسنانه يقعد الشهرين والثلاثة والاربعة علشان ينطر مواعيد الاسنان والخلع والاعصاب، تدرون ما يراجعهم إلا واحد واصل حده مرضياً ومادياً وبعدين مو معقولة ان الناس كلها تتجه للعيادات الخاصة اللى علشان تراجع مرة واحدة تدفع اكثر من 80 أو 100 دينار دفعة واحدة ترا الناس اللي فيها كافيها وكافي عوار راس بسبب عوار الضروس!!

يالله سترك.. حاشا شيكاغو مو الكويت، خمس جرائم سطو مسلح مرّة وحدة وبعز النهار وجريب الفجر اتصير بديرتنا، صج عسى الله يستر على نعمة الأمن اللي مو حاسين فيها.

تكفون يا حكومة وتكفى يا وزير الداخلية انتبهوا لهالسوالف تراها القشة اللي راح تقصم ظهر البعير مثل ما يقولون إذا ما تلاحقتوا الأمر وضربتوا بيد من حديد هالمجرمين وصدقوني ما خلاهم يسوون مثل هالسوايا إلا أنهم مأمنين العقوبة ومثل ما أنتم عارفين من أمن العقوبة أساء الأدب.