كشفت دالي حسن بطلة كليب "ركبني المرجيحة" كواليس تصوير الأغنية، وقالت: "أنا كنت صايمة وأنا بصور الكليب، لأننا كنا بنصوره فى رمضان، والكليب ده أساسا جزء من فيلم كوميدي اسمه "بالوظة" وجبنا المصور من الشارع يصور لنا الكليب"، وقررنا بعد النجاح اللي حققه إننا نغير اسم الفيلم من بالوظة إلى "ركبني المرجيحة".
وتابعت، "أنا شايفة نفسي بعد 5 سنين هاكون فنانة مشهورة، لأن صوتي رقيق والجمهور بيطلب مني أعمل مهرجانات وكليبات أطفال، وناس كتير بتقولي استمري فى نجاحك وملكيش دعوة بتعليقات أي حد، وأنا شايفة صوتي حلو وبالذات في كليبات الأطفال، وفرضت نفسي على الساحة الفنية.
وأوضحت، "قبل عرض الكليب طلبت من المنتج اتفرج عليه لكنه رفض، بس الكليب مفيهوش حاجة وحشة، وأنا مبسوطة بيه، وبضحك لما بتفرج عليه".
واستكملت، "بحب كل جمهوري اللي بيحبني وبزعل من اللي بينتقدني بس بنسى وبسامح.. ولو اتصل أحد منتجى الأفلام السينمائية من أجل الظهور فقط فلن أوافق وهشترط إني أظهر بجانب بطلة الفيلم".
وأضافت: "أنا مترشحة أدخل مسابقة ملكة جمال العرب ومدير المهرجان كلمني وقالي أنتي هتكوني في المهرجان، وأنا واثقة في نفسي جدا، وقادرة على الفوز، والستات بتيجي جنبي في الشارع تقولي بسم الله ما شاء الله من جمالي". وعن حياتها الشخصية قالت، سبق ليا الزواج من إنسان كويس جدا ومعروف، وأي واحدة تتمنى تتجوزه ومعنديش منه أولاد بس محصلش نصيب نكمل، وحاليا أنا مش مرتبطة".
واختتمت حديثها، "أنا بحب صافيناز جدا وبحب صوتها، وليا الشرف إنى أكون شبهها، وبحب كمان محمد رمضان وهو ممثل جامد فى الرومانسي والكوميدي وكل أفلامه مفيش زيها، ونفسي أمثل فيلم معاه، أما بالنسبة للغناء فمثلي الأعلى الفنانة وردة الجزائرية.
يذكر أن فيديو كليب "ركبني المرجيحة"، انتشر عبر ساحات مواقع التواصل الاجتماعي ، وأثار الجدل . يذكر أن فيديو كليب "ركبني المرجيحة"، انتشر عبر ساحات مواقع التواصل الاجتماعى، وأثار الجدل .
