شكّيت بعيون العواذل سكاكين
واسدلت من جفن الليالي ستاره
واصغيت لاصداء المشاعر بتدوين
وللشعر في قلبي عيون وشراره
والشوق فيني يحطب القلب ويدين
ويشبّ بضلوعي من الهمّ ناره
ياللي تلوم الروح بالشعر عن مين؟
لا تبهت احساسي وتهدر بذاره
عدّ الحنين إن جاب غايب يعزّين
وعدّ المعزّي ياخذ إن حنّ كاره
ويافيلق الذكرى تعالوا على وين؟
زفوا على قلب الحزينه البشاره
جيبوا لها من ريحة الدار شيـّين
ريح الحنين و ريح جدّه و داره
وان كان باقي له من الشوق قوسين
فالقلب ع ابوابه جنود وخفاره
والعمر يدفنـّا على مود بعدين
يارب ماتنفد سنينه خساره
