الشعر ضيقه تستغل الثواني
والليل كتله من شعور التباريح
ذكراك مدري شوقي اللي خذاني
وأشعل لك بـ ليل التجافي مصابيح
أغيب وأتشرد بغربة زماني
وأجيك غيمه ساقها هبّت الريح
وأصد مدري شعور ضيقه حواني
أو الغلا لحظه من احساس ويسيح
لا تقول مغرور وغريب واناني
انا بشر كومة قصيد وتجاريح
عطيت لكن منهو اللي عطاني ؟
من يذبح الضيقه من الصدر وتزيح ؟
اللي يبي قربي انا في مكاني
واللي طعني يا عسآ ربّي يبيح
ماتت بوجه المقبلات الاماني
وظليت مثل اللي تذرَّا على شيح
لا صد عن ريح الشعر والأغاني
ما قام لا ثابت ، ولا راضي يطيح
يا صاحبي لو غبت بين المحاني
الوقت داير والليالي مراجيح
بكره تحس بضيق فقد وتعااني
وتدور لـ ضيق الليالي مفاتيح
أذخر دموعك خلها وقت ثاني
ماهي بحاجة منك دمع التماسيح
أنت أول اللي للقصايد رماني
وانت آخر اللي ممتليني تباريح
