قبل الندم .. ماكان لي من فم ..
قلت انهدم ..
بعض الهدام اكرم ..
من وقفةٍ نصفي بها ، مو بي ..
ونصفي لها .. مرجم ..
بعد العنا :
لبنى أنا غربة تطق الباب ..
قلبك / يدك .. ماتفتـــح لأغراب
قلت الـ “ لبَـن “ .. رضعة تشيل حجاب
مكري مسح ( شكل ) الــ كلام وشاب
(مع ) بعضـــنا نقدر نجيب اسباب
(كل ) الضنا : نصفي .. بعضَّة نــاب
وجه الشبه : وجهك قــمر لو غاب
صبّ الشموس فيوم .. وإلْهب آب
بين الأنا والأنا :
عطف انطفى عننا ..
أو اننا من غاب صوتك كننا :
صمتٍ يثرثرني عليّ :
ياهيه ليه ؟!!
حوّى نوَت تحتوي آدم ولا امدى عليه ..
ياهيه ليه ؟!!
من مات ( جدّ ) الــ أبجدية صحت به :
ياهيه ليه ؟!!
مادام وجهك لك اجل .. ليه امتلى وجهك وجيه ؟!
وكلها لبنى أو كلها وين انت ..
وماكنت أسمعني ياكيف اجل لو كنت ؟!
اللـي سمعتـه زيـن ... اني صرختك لين
صارت عـيوني لك ...
ولكـل آه : اهليـن !
وبلّـلّت لبنى لوم ..
حتى طفح كيل اول حروف اسمها .. ولامها
أكمامها .. أكمامها .. ياهي ارهقتني .. عطر ..
من أمري وهي اهرقتني : شعر
واوصتني بصدري طير يوم اوصت :
لاتهدر مياه الشعر في الأخلاق والمضمون ..
الشعر عرش الكون ..
الشعر هو شربك حواف الـ ما
من الموال .. لين انك تفيض
رقاب من دهشات ..
تفيض .. تفيض :
على جدارٍ .. على وشك السجود .. فشهقة الأصوات ..
تفيض .. تفيض :
لين انك .. تغيض الصمت في فمّ البذور ..
اللي حلفت تحرم على الإنبات ..
الشعر ياهذا هو انك تقتنص أكبر مدد ممكن من اجنحة الفراش ..
ورفرفة عصفور .. فوق السور ..
وسيلٍ من الرحمة
كما الزحمة فصَدِر عذر الرصاصة الطايشة ..
الشعر ياهذا هو انك .. لو انا منّـك ..
تعدّ اكبر عدد ممكن من اللي قد سبق ذكره ..
سبق شكره ..
سبق عطره :
على كف وأصابع بنت بعثرها الخجل بعد الغزل ..
وبلا ندم مالملمت من قلبها إلا اللـّمم ...
الشعر ياهذا هو انك : لو أنا منّـك تسنّـك ،
ثم تشنّـك حرب ضد الحبر
حتى انه يخلي أزرقه مثل البحر : رزقه ..
الشعر هو انك تناسى تسأل الإنسان عن اسمه ومع هذا تعرفه
الشعر : طيشٍ .. صاغته .. حكمه ..
هكذا أوصتني لبنى .. لا تقول اوهام ..
مو أيّ أنثى .. هذي لبنى شوي لو مالت ..
تشمّ الورد : مال الشام !!!
“ بروحيَ تلك الأرض “ لو ترضيك يالبنى ..
ولكني أنا الأدنى شبه بالشهب ..
من صرتي : حروف اسمك وانا المعنى !!
وفي المعنى حصل ضعنا وضيّعنا وسألنا طفل :
ياطفلٍ وتوّه يحبي
بامي وابي .. قل لي اش تبي :
يوم انها تمشي الهوينا كالذي :
يمشي .. على خاطر .. نبي !!
أخضعت قلبه قبل : قـُـبلة .. لقلبي الذي
من بعــــــدها – وبـْرضى عيني - عليّ انقلب
يا أخّ .. ضعت وسمعت .. فيني الجهات تهذي
أثر العيون : السماع .. دام الضياع : الضخب
حاولت اغمضّ واغضّ .. طرفي .. طرفته بذي :
اني معه مثل حرف الباء .. في : “ باءْ بغضب”
السابق اللي انسبق .. المحتذي بلا حــــذي
السالب اللي انسلب : لبّه .. بلبّ ٍ .. سلــــــب:
الهوامش :
ماتقدّم من قَــدَم أفصح سؤالٍ .. ُ قـــدّ من قلبه .. وقال :
من قدّ لبنى .. في الجمال ؟!
المراجع :
ماوَهَـج .. من وجه لبنى ..
وما تأخّر .. من قديمات المواجع !
