مقامات

لاتحسب إنّك ماليٍ يَدْك منّي
 انا ليا وصلـت معي يمكن آعـيف
مـادامـي أسولف وأهـيجـن واغني
 باصبر على صدك ولك حشمة الضيف
وان زدت في غـيّك وبك خاب ظني
 مـاعـاد والله ينـفـعـنّ السواليـف
لـو كـل شيٍ نــدركـه بالتمنّي
 ماشـفـت بــدروب الأمـاني مناكيف
وان كان قـصدك بالغـلا تمتحنّي
 نـاظر عيوني تعْرف الكمّ والكيف
قـدرك تعَرفـه بس ، لاتحْسب إنّي
امشـــــــــي معــــــــك واذبّ روس المشــــــــــاريف
هـذا الذي ماقواه من صغر سني
ما آهين نفسي لو على رقبتي السيف
وكانك تبي تبحر بقارِبْك عني
اهديت لك من عوج صدري مجاديف .!