ليتني لا جا هوا الغربة جماد أو ليتني
أزرع النسيان أرضٍ ما تعرّيها الوجيه !
ادري انك لو تخليني أبد ما أخلَيْتنِي
وانت لك في أبسط أشيائي قريبٍ واهتويه
من زمان الشعر لاجابك ولا به جيتني
من زمان استطعم الـ(رايح) لقا ماعشت فيه
من زمان الين جيت البارحة وابكيتني !
احتياجي اجتياح المقدرة من دون ليه !
صافحت كفي حنيني بعْد ماحنّيتني..
من خضاب الوعد الأول واحتمالاتي عليه!
زنت به حزة “أماني” قبل ما خلّيتني ..
عُمر شباك الأماني صاحبي ماقال إيه!
بين ممطور الجفاف اللي معه حدّيتني
ضلّ أجمل انتماءٍ ظلّ بي عمر أقتفيه..
بعد هذا لاتلوم القلب لا حطيتني :
خارجه .. ينبت لك المعنى بُكا من راحتيه
