رطبا جنيا
ارفع ستار العمر ياشعر .. واكشفني
دام أغلب اللي مضى تتشابه فصوله!
لك مسرح الذكريات.. الليله اعزفني
لو باقي لحزننا جمهور يصغوا له
ياصاحبي .. والمنام اللي جفا جفني
غاب.. وترك لي عتاب سنين مسدولة!
سرحت.. ما بيني وبيني أسولفني
وآقلّب -ألبوم عمري- ليلي بـ طوله
راحت ثلاثين! .. وأقداري تحاذفني
حتى غدا “الحلم” متعلق من رجوله!
راحت ثلاثين جولة .. لين كتّفني
حمل الطموح الثقيل وطحت في جولة
يا أول العمر ، قل لآخرك :خالفني..
ولاتتبع اللي وصل لدروب مقفولة
ويامضغة كل مااعزّم .. تسوّفني!
وين المشاوير تاخذني؟ ومنهو له؟؟
عبدالله الظفيري
