مر نصف الليل ما طاحت جفوني
غير نجم ٍ شاغب الظلما وطاح
من سرق من ليلتي ساعة سكوني؟
من نبش في وسوسة صدري وراح!
من يقيني ما عرفت أكبح ظنوني
قلت أسيّل بالقلم صمتي.. وساح..
بالورق شِعر ٍ قطع شَعرة جنوني
وعذر مجنون الشعر ذنبه مباح
والسهر ساري.. لمح ضوّ بعيوني
نوّخ اركاب التعب بي واستراح!
والمحاني شكَلت مجرى طعوني
من كثر ما تمطر بصدري رماح!
واذكر من الناس كم ناس ٍ نسوني؟
وكم بقى بي حلم مكسور الجناح؟
حادي الأحزان لا تثقل متوني
شف غدت كيف اتفتّق هالجراح!
ليلة ٍ سجانها خان بـ سجوني؟
وأعتق لـ هالضيق فيني واستباح!
ياطيور الصبح فارد لك غصوني
رفرفي فـ البال وأهديني صباح !
عبدالله مرعي الظفيري
