يقول الشيخ عبدالرحمن السدحان بلهجته التي لم نحاول تفصيحها ولا التدخل بها اذ جاءت مباشرة من قلبه :
“ كنت اعمل في مدينة الرياض وفي عطلة عيدالاضحى المبارك عام 1395هـ سافرت الى شقراء انا وزوجتي وأولادي وكان لدي ولله الحمد ثمانية من الاولاد اربعة ذكور وهم محمد واحمد وهشام وتركي ولي ايضا اربعة بنات وهن عواطف وهي الكبيرة ولمياء وهند وهيفاء ، يوم وصلنا شقراء رحت واستأجرت بيتاً وجلسنا فيه حوالي عشرة أيام ، وفي ليلة الاربعاء الرابع عشر من شهر ذي الحجة ، بتنا في خير ليلة ، وفي آخر الليل استيقظت وكانت أم العيال مريضة فرحت وسويت لي قهوة وتقهويت وصليت ما شاء الله لي ان اصلي ، وما دريت الا والله اسمع صوت هسهسه مثل قرض الفار للخبز اليابس ، شكيت في الأمر وكانت الدنيا مطر ورعود وبروق يعني ليلة شديدة جداً ، فقمت وبحثت في البيت وناظرت يمين وشمال ، وكنت في الدور الثاني ولعت اللمباة ونزلت للدور الارضى وطالعت الا والله مهنا شى ، رحت وولعت لمبات الغرفه اللي نايمة فيها ام العيال هي واعيالها الصغار ،، استيقظت الله يرحمها واسألتني (هو انت تقهويت) قلت نعم قالت (كم باقي على الفجر) قلت باقي نص ساعة ، قلت تبين قهوة قالت ، نعم ابرضع البنية وابجي اتقهوا..
رحت من عندها وقعدت اصلي حولها في مكان مثل الطريق عند الغرفه ويوم كبَرت وانتصفت بالفاتحة ، ما ادريت الا البيت بدا يتحرك واشوف الجدران تتهدم قدامي والطابقين طاحت على بعض علي انا واعيالي ولكن بقدرة الله سبحانه وتعالى ما حسيت عن نفسي الا وانا في الشارع واناظر البيت وهو يتساقط على الارض واعيالي كلهم فيه..
قعدت اصيح وانادي للمسلمين ، يوم افزعوا جزاهم الله خير ، و بدأوا يتوافدون علي ، والله يوم ارفع راسي الا هذي غرفة بالدور الثاني كانت معلقة مثل المقصورة ما طاحت وبقيت وحيده على عمود واحد ، وكان فيها اولدي محمد وهو الكبير فيهم ، واسمعه يصوت لي ، جبنا له سلم نزلناه منها وكان ولله الحمد سليم معافى ما فيه شيء..
يوم نزلت محمد طلعت انا واياه على الطين واثري اسمع صوت اصياح فالتفت الى محمد وقلته تسمع شى وانا ابوك قال ايه هذي اختي الصغيرة هيفاء (عمرها سنة وشهرين) صرت ابحث انا والمسلمين حتى بانت علينا رجليها يوم اظهرت رجليها بديت احط ايدي دونها توقيها واليد الثانية احفر بها واطلب من الناس انهم يبعدون علشان لا يجيها شيء (لو جاها شى ابيه يجيها منى انا مهوب من احد غيري) بقدرة الله سبحانه وتعالى اخرجناها سليمة ما فيها الا العافية قعدت امسح التراب من على وجهها وحبيتها ونزلتها على الارض اتفحصها من كسور والا عوار والا جروح ما دريت الا قامت تركض ، قلت لها وين تبين تروحين يا هيفاء قالت ابروح لماما وجت بنت حلال جزاها الله خير وشالتها تلعبها..
اما البقية فقد حضر الدفاع المدني وبدأو يبحثون عنهم على انقاض ثلاثة امتار من الطين ولكن للاسف كل ما طلعوا واحدٍ منهم الا هو ميت ، الا الكبيرة من البنات اول ما طلعوها وتحسس عروقها الطبيب لقها تنبض رحت مسرع وحطيتها على كتفي و وديتها لسيارة الاسعاف وهو شغال ومشينا للمستشفى ، يوم وصلنا المستشفى وكشف عليها الطبيب وما دريت الا قالي يا ابو محمد البنت لها ربع ساعة متوفية ، قلت لا حول ولا قوة الا بالله ، إنا لله وإنا اليه راجعون..
المهم تولى المسلمين جزاهم الله خير تجهيز المتوفين وصلينا عليهم بعد صلاة الظهر فقلت هذه الابيات..
يا مل عينٍ دمعهـا صـار مـدرار
دمـعٍ علـى دمـعٍ بخـدي تلاقـا
يا جرح قلبي جرح مجروح الأطيار
وده يطير ومـن جروحـه معاقـا
لي ونة من سمعها صـار محتـار
كنـي سجيـنٍ للمنيـة يسـاقـا
عليك يا خـلٍ فقدتـه بالأسحـار
صارت اعيوني من دموعي غراقـا
ما مثلها بالناس في كل الأمصـار
غروْ نفل جيلـه بزيـن الأخلاقـا
ماتت حيـاة الـروح والله جبـار
يجبـر مصيبتنـا علـى هالفراقـا
عند الدفن هيضت مكنون الأسـرار
هيضت عبراتـي عليهـا اشتياقـا
معها ثمار القلب طاحت بهـم دار
راحو بهم للقبـر عقـب الإشراقـا
شفت النعش بالعين يوم القدر صار
صارت ارموشي من دموعي حراقا
كن الحشا من فقدهم فيـه منشـار
يقطع شوايه والوجع مـا يطاقـا
أصبر على كل المصايب والاقـدار
والاجـر عنـد الله مالـه غلاقـا
وفي يوم العيد من السنة القادمة وهو اول يوم عيد بعد وفاتهم رحمهم الله ، طلعوا الناس بعد صلاة العيد وصارت الحريم تنادي على رجالها والاولاد ينادون ابوانهم ،،، وانا والله المستعان ما احد ينادي ، وكنت بالسنة الماضية مثلهم او احسن منهم ، لكن صرت في ها العام لوحدي (محمد كان رايح عند عمه ، والصغيرة هيفاء كانت عند خالي تبناها منذ صغرها بعد وفاة والدتها ) والحقيقة اني تأثرت بالمرة يوم شفت كلن يحبب اعياله والناس كلهم مستانسين مع بعضهم الا انا جالس لوحدي (لا امرأة ولا أولاد) وما دريت الا الدمعة تذرف من عيني وبدا الهوجاس يحاكيني وقلت هذي القصيدة .
اليوم يـوم العيـد والنـاس بسـرور
فرحـو بيـوم العيـد والـي يجيبـه
علامة الفرحة علـى كـل منظـور
تضـوي قناديلـه وللنـاس هيـبـه
تـزاورو شبـان واكبـار وبــزور
كـلٍ يحـاول يهتنـي مـن حبيـبـه
خلق الله إتعيدو وأنـا اليـوم مقهـور
عـزي لمثلـي وان تـردى نصيبـه
انا حزيـن القلـب والدمـع منثـور
قلبي تجَرح مـن كثـر مـا يصيبـه
ابكي نهـار العيـد خـلان وابـزور
قلبـي تعـذب قـازيٍ مـن وجيبـه
العـام قدامـي وهالعـيـد بقـبـور
والرحمة اوسع من عظيـم المصيبـة
من علتي مـا فادنـي طـب دكتـور
علـة حشـاي حايـرٍ بهـا طبيـبـه
عـزي لحالـي كـل يـومٍ بحـادور
والنوم من كثر العنا مـا اهتنـي بـه
حلفت باللي نوره أنور مـن النـور
نـزل كـتـابٍ للـمـلاء تهتديـبـه
ما انسى حبيب الروح والحلف مبرور
ما نيب ناسيٍ مـن هروجـه عجيبـه
مفرج الضيقـات بالـراي والشـور
عفيف نفسٍ مـا وطـى مـا يعيبـه
غريب جنسٍ طلعتـه كنهـا بالحـور
واذا هرج يشفـي جـروح عطيبـه
من خلقته مقبـول والحـال مستـور
واذا بـدى لازمٍ مسـمـوعٍ لبيـبـه
هو مطلبي والعبـد منهـي ومامـور
حبـه سطابالقلـب مافـيـه ريـبـه
يا لايمي منتاب فـي اللـوم مجبـور
لا تفتـري والـرب فوقـك رقيبـه
من مات في حب المواليـف معـذور
والــدايــم الله كلنانعـتـزيـبـه
عسى جزاي بخلتـي سعـد وحبـور
فـي جنـة الفـردوس يـوم التقيبـه
وفي ليلة من الليالي اجزعت عيني من النوم وقمت اتذكرهم الله يرحمهم واصبحو يمرون قدامي واحد واحد ، وفي آخر الليل قمت اكتب هذه القصيدة .
البارحة فاضت دمـع العيـن وقانـي
عن نومي الغالي اللي جيت شفقٍ لـه
كلـن رقـد نايـم بالليـل فرحـانـي
مـع جادلـن قذلتـه للـردف منهلـه
وانا اتقلب تسمااللي طـاح وجعانـي
والقلب من علتـه كنـه علـى ملـه
على ضنايا وخلتـي بـت سهرانـي
من حر قلبي لكـن اعضـاي منشلـه
ياحصـةٍ قلبهـا بالـحـب مليـانـي
يانور عينـي عليـك الـروح منسلـه
وعلى عواطف يسيل الدمع عجلانـي
يـا بينـةٍ مالهـا مثـلٍ بخـلـق الله
ولمياء حشايه وعمـري مالهـا ثانـي
ابكـي عليهـا وقلبـي صايبـه علـه
وهند الصغيره عليها القلـب ولهانـي
ابكـي عليهـا بدمـعٍ غالـيٍ كـلـه
واحمد حبيبي عليـه القلـب شفقانـي
من حر فقـده عليـه العيـن معتلـه
ابكي على سـادسٍ اقفـى وخلانـي
هشام حبي يريف النفـس هـرجٍ لـه
وتركي حبيبي صغير السن والشانـي
الا ذكرته يجـض القلـب حبـاً لـه
يا سبعةٍ شلتهم مـن تحـت الاطيانـي
لو قلت ابسلي تقـول العيـن لا بلـه
اصبر على ما قضى الرحمن واعطاني
وأحمد وليي جزيل الحمد شكـرً لـه
ماني على ما قضى الرحماني زعلاني
استغفـر الله عـن السئيـات والزلـه
وصلاة ربي عـدد مـا كايـنٍ كانـي
على نبي الهـدى واثنـي سـلامً لـه
