فهقتك عن ثمـان العـوج أدوّر للحديـث انفـاس
ولا جمّعت من بوح الحشـا مـا يكتـب انفاسـي
تحايلتك على عرش الخفوق ومن هديـر اليـاس
هدر لك من عيوني ما كتب لك صادق احساسـي
تموت احْروف مجنونك على خرْس الشفا اليبّـاس
كثر ما مات لك في محْجر عيـون الرجـا باسـي
هزيم ولا لقيت فـ داخلـي ملفـا ولا مجـلاس
بغيت ارحل وقيدك لا ثنـا رجلـي خضـع راسـي
ياليت ارواحنـا ياسارقـي مـن دونهـا حـرّاس
مـ كنت احايلك حرفٍ غدى مـن دون كرّاسـي
وياليت عيوننا تفضح مـ نخفي من وراها احسـاس
مـ كنت اتْوَسّلك همسـة غـلا واعـوْد بفلاسـي
وياليت قلوبنا مـن دونهـا مـا يرجـع العسّـاس
عرفت اشلون مـن قمّـة ليانـك جيتنـي قاسـي
لو اطغاك الحلا والطيش واسـرف قـدّك الميّـاس
تحايل فـي شعـورك واتّظاهـر كنّـك الناسـي
تحايل في شعورك وانت من مّاطاك ليـن الـراس
تـدقّ اجـراس خفّاقـك علـى ترنيمـة اجراسـي
أنا عرّاب عشقك لـو تزاحـم مـن وراك النـاس
هنا جـرّة شِفَـاك تعانـق اللهفـة علـى كاسـي
أنا خمرة غلاك ومنتهاك وصاطـي الهوجـاس
انا ابقى فـوق جمّـارة خفوقـك وحْـدي الراسـي
لو اطغـاك الزمـان اوْجنتيـك وسطـوة النّعـاس
احبك لو هجادك ما تـرك لـي لحظـة انعاسـي
وأحبك كثر ما خانـت حروفـي هقـوة القرطـاس
وكثر مـ اضرب من اخماس الحنين بْمفرق اخماسي
وكثر ما جيتـك احبـك بـلا منّـه ولا مقيـاس
وكثر ما رحت واكفوفي ملايـا مـن عطـا ياسـي
وأحبك لو يخون العوج صمتي والحديـث انفـاس
ولا اجْمَع لك من انفاس الحشا ما يكتـب انفاسـي
