مقامات

سم فنجال اشقر البن علّك بالوجود
سولف ولا تطري العفو عند المقدره
اقدر اعفي عنك ذلحين.. لكن لو تعود
والله ان العفو بعدين ماعاد اقدره
سرّها والليل يخفي تفاصيل الجحود
في صباحٍ دون شمسه هبايب وإكدرَه
لو تفكّر بالصداقه مواثيق وعهود
مثل تفكيرك بتطقيم ثوب وكندره
كان يمديني عطيتك على قدرك وعود
ولاْانقطع لارسال يا صاحبي من مصدره
اذكرك بالطيب وامسح يمينك دهن عود
لو هديرك بالردى باح دمك واهدره
عادتك ولا على الوقت من عادتك زود
والزمان ان كان دارك على وجهك .. دِره
من كثر ما اجود لي في عبادٍ ما تجود
اكتشفت ان الوفا طبع .. لكن ما اندره