خَلِّني ابعد ..
عشان اعرف أَقَّرب
عشان الملم شتاتي
واتمعن وسط ذاتي
تهت ..
وتاهت دروبي
ابتأكد ..
شعوري هذا من قلبي
ولاَّ إشعار لهروبي
خَلني أبعد ..
ما ابي طَّلت حضورك
ولاَّ صوتك
لا تجيني كل لحظه ..
تكفى لا تفرض وجودك ..
ترى حضورك كثير طاغي
تراه مُربك ..
انا ما ابي .. عقلي يتغيَّب
واضيع في أفق أزرق
أفق باهت
تعرف انه شعاع النور
يحجبه الغيم..
ومهما يكون جميل ساحر ..
تلاقي موضع الخطوه ..
فيه تاهت
بحب بجد .. بس بكامل شعوري
وانا صاحي ..
ابي الإحساس يباغتني ..
يجي عفوي ..
يجي صافي
ترا وهجك ..كثير مُربك
وانا اعرف زين ..
إذا كان الضَّوا باهر
تفاصيل المشهد المرئي ..
اكيد تغيب
واكيد تربك
ابترك هالعنب ينضج
في شمس صدري
ويصير العالم الضيق
أراضي براح
عشان التَّم .. من شتاتي
عشان ارتاح
خلَّني أبعد
وخذ وقتك ..
ترى ماني الذي .. يدق قلبه
لأي كلمه ..
ولا اللي يجهل شعوره
وهي ذاته .. وهي علمه
ولاني عندي عقدة نقص
وبرضي فمثلك غروري
أنا مخلوق لو حبيت
يبان الصدق فشعوري
يبان فنبضي وانفاسي
ويتوهج مثل النور
فعيوني
ابشفى .. من وهج نورك
عشان احيا ..
أبركن .. لو قليل
للوعي والحكمه
ابفتح شرفه للصحوه
ابتحاشي طريقي لك
عشان اشفى .. من العتمه
بشَّرع لي نوافذ غير ..
وباستنشق .. هوا نادي
هوا أبيض
تمعن شوف ..
شبابيكي مُغفله ..
جثث مهزومه في صدري
وكانت لي ..
مثل ما انتَ .. هاللحين في صدري
ووين صارت ؟!
تمهل .. يا بعض شي
من ملامح ارتوت فيني
وضي ..
لا تغرك المسافه ..
المسافه .. ما هي شي
خلَّني ابعد ..
ابي يجتاحني غيابك
ابتحرق واكتوي فملحه
ابوصد باب على بابك ..
عشان اميز احساسي
وأعرف ليله من صبحه
ابيه واضح وصارخ حيل
ابيه سافر ..
ابطرد وهم .. تعودنا
وليه انكابر .. ونخفيها
حقيقة ..إحساسنا فينا ..
عبث وقتي ..
أثر مصنوع ..
اثر فاتر
بوفر مُر هالشعره
عشان تعيش لي باكر ..
ابا حسك تسري في عقلي .. كما لو ماء
في وسط الأرض.. يتسرب ..إذا عطشا ..
ابي في الحب ..
دفاه ولونه الوردي
وأبي بطشه ..
انا مخلوق لو حبيت ..
أصون المعنى والعشره ..
ولا اغدر يوم .. في عسره
واحس بصاحبي لو مر ..
على اهدابه ألم حسره ..
واموت وأحيا لو بيدي
ولا تجتاحه هالنظره ..
انا ما اقول احب اللحين
في ذي اللحظه ..
وبعد يومين .. اتراجع
اقول احساسي غالطني
طلع كذبه ..
تسلينا أكم(ن) يوم
وبددنا من العمر كم يوم
وحانت ساعة الفرقي ..
انا اطهر من هالكذب
وانفى ..
ابا احس الزمن لاغي
فوجودك ..
وعمر طويل فغيابك ..
خلني ابعد ..
يمكن في تراب بعدي
تبان الصوره بالكامل
لوح الوقت حيل شفاف
ما يدجِّل ولا يجامل
خلني ابعد
يكفي لو انا بعدنا
من بعدها ..
قلنا انه شي عادي
ما تناغمنا كثير .. وافترقنا
يمكن أنَّا مش حبايب ..
بس أكيد .. مش أعادي
خلَّني أبعد ..
بعيد ..
عشان أعرف أقَّرب
