صب لي مالك علي الا شرابك
لو على سـد الشراييـن ارتويتـك
تدري اني ما ذخرت الا زهابك
وتدري اني ما خذيت الا عطيتك
الخيال اللي مـن الغفلة سرابـك
لو شكاني منك ماجيت اشتكيتك
قبل لاتحسب جفاك احسب حسابك
انك الرجم الوحيد اللـي رقيتـك
ارتقيتك من ذهابـك لِـ ايابـك
كل ماجيت انتهـي فيـك ابتديتـك
كني الدرب الطويل اللي مشى بـك
وكنك خيوط الظـلام اللـي سريتـك
اوصلك لكن قبل ذنـب ارتكابـك
جيتك من اقصى الضمير ولا لقيتك
ما لقيت الا وقوفـي عنـد بابـك
ولا صحيت الا وانا قدام بيتـك
ولا وصلني منك غير اقسى عتابك
لين ضاقت دمعة العين وبكيتـك
ليت مايطري .. من التفكير .. جابـك
ليت [ مفتاح الرضى ] كلمة : رضيتك
وليت ما فكرت لحظه في غيابـك
وليتنـي بعـت الأوادم واشتريتـك
وليت ماحطيت فوق القلب نابك
كان لا جيتك على بابك لقيتـك
